இலங்கை, அந்நிய செலாவணியை ஈட்டும் முக்கியத் துறையாக விளங்கும் பெருந்தோட்டத்துறையின் வேதன அதிகரிப்பு இன்னும் கானல் நீராகவே உள்ளது.
காலநிலை மற்றும் தற்போதைய பணவீக்கம் உள்ளிட்ட காரணிகளை கருத்திற்கொண்டு பெருந்தோட்டத் தொழிலாளர்களுக்கான நாளாந்த அடிப்படை வேதனமாக குறைந்தபட்சம் 1700 ரூபாவை வழங்க எதிர்பார்ப்பதாக ஜனாதிபதி அண்மையில் தெரிவித்திருந்தார்.
அதன்பின்னர் இலங்கை தொழிலாளர் காங்கிரஸ் மற்றும் இலங்கை தேசிய தோட்டத் தொழிலாளர் சங்கம் உள்ளிட்ட பிரதான தொழிற்சங்கங்களும் அந்த தொகையினையே பெருந்தோட்டத் தொழிலாளர்களுக்கு வழங்க வேண்டும் என்ற கோரிக்கையினை முன்வைத்து வருகின்றன.
மூன்று வருடங்களுக்கும் அதிகமாக, கூட்டு ஒப்பந்தம் இரத்தாகியுள்ள நிலையில், வேதன நிர்ணய சபையின் ஊடாக குறித்த தொகையினை பெருந்தோட்ட மக்களுக்கு வழங்க நடவடிக்கை எடுக்கப்பட்டுள்ளது.
எவ்வாறாயினும், பெருந்தோட்ட முதலாளிமார் சம்மேளனம் வேதன நிர்ணய சபையின் இரண்டு கூட்டங்களையும் புறக்கணித்தன.
இதனால், மார்ச் மாதம் 8ஆம் திகதி வரை வேதன நிர்ணய சபை கூட்டம் பிற்போடப்பட்டுள்ளது.
எவ்வாறாயினும், மே தினத்திற்கு முன்னர் பெருந்தோட்டத் தொழிலாளர்களுக்கான வேதன பிரச்சினை முடிவுக்கு கொண்டுவரப்படும் என தொழிற்சங்கத்தினரும் மலையக அரசியல்வாதிகளும் வாக்குறுதிகளை வழங்கியிருந்தனர்.
அத்துடன், பெருந்தோட்ட தொழிலாளர்களுக்கான வேதனத்தை வழங்குவதற்கான விலைச் சூத்திரம் ஒன்று அறிமுகப்படுத்தப்படும் என அரசாங்கம் அறிவித்திருந்த போதிலும் இன்னும் அதுவும் நிறைவேற்றப்படாதுள்ளது.
இந்தநிலையில், புதிய வாக்குறுதிகளுடன் தொழிற்சங்கங்கள் நாளை மே தின கூட்டத்திற்கு தயாராகின்ற நிலையில் இந்த வருட மே தினமும் கறுப்பு மே தினமாக அமைந்துள்ளதாக பெருந்தோட்டத் தொழிலாளர்கள் தெரிவிக்கின்றனர்.
